Pantun

PANTUN SEUMAPA

1.MEULAKEE / TANDA KONG HABA

Seulangke Blah Linto....

Assalamu'alaikum Warahmatullahi Wabarakatuh.

Ulon tuan nyoe keunaleueng lidah

haba amanh Haji Sofyan sekeluarga

Aneuk digobnyan nibak siuroe

Lemah lam lumpoe saboh rahsia

Ji meulumpoe disinoe na bungong sitahon

Meubee that harom rata lungkiek gle

Get that neupapah neutingku seu on

Bungong dalam on mantong bak tangke

Jiengieng bak jaroe na gaca mirah

Jingieng bak babah na kilat gigoe

Sanggoi bak ulee pih lagee kipah

Taloe kupiah tok tok beuragoe

Ok patah mayang boh mieng meukilat

Gigoe jieh rapat puteh meucahya

Ki ieng jih rampeng baho jih keumang

hidong jih panyang lagee india

Ji meulumpoe malam Jum”at

Lagi lom teupat buleuen purnama

Kadang pieh salah kadang pieh betoi

Kadang pieh cantoi syaitan peudaya

Lon meuniet Teungku keu ahli nujum

Ureung yang tudum urat lam donya

Neuci boh arti takwi lam lumpoe

Neuci hareutoe pakriban makna

Seulangke Blah Dara Baroe....

Ji meulumpoe malam jum”at

Lagi lom teupat buleun purnama

Teuntee lumpoe nyan lumpoe beutoi that

Lumpoe nyan meuhat lumpoe aulia

Aneuk leuek kutru ateuh rueng gunong

Jipo jitamong lam keubon raja

Lam lampoh kamoe na padum boh bungong

Nyang toh meukeunong yang Teungku mita

Seulangke Blah Linto....

Keumang bungong mee watee uroe tron

Keumang sitahon bungong melati

Keupeu oh lheueh na unoe meuron ron

Yang kamoe rihon sinyak Nur Aini

Nyan jeut troh langkah uroe nyoe ulon

Bungong sitahon peue na soe rante

Peu na soe tanyong bungong dalam on

Jinoe bak ulon cuba neu lahe

Seulangke blah Dara Baro....

Bak beuradeuen timoh lam gunong

Kayee meuganong bak meudang ara

Goh na soe rante goh na soe tanyong

Bungong nyan mantong bak cadeuen muda

Seulangke Blah Linto....

Di gampong blang oe teumpat lon lahe

Teumpat lon mate walluhu’alam

Lon jak meulake ngon ikhlas hate

Beu ek meusampe neubri le tuhan

Bak teungku bungong bak kamoe kumbang

Muhammad ikshan linto meuteuntee

Meunyoe ka ek jeuet neujaweub reujang

Dak jeuet lon tuan bek neubri malee

Seulangke Blah Dara Baro ....

Neujak ba kumbang, teungku boh hate

Bak kamoe sang gle meunan umpama

Neuboh ngon rangkheum bek gob tanong le

Bungong bak tangke teungku boh tanda

Seulangke Linto Baro....

Meunyoe ka neutem ngon Muhammad Ikhsan

Teungkeu kheuen reujang padum jeunamee

Pakri ban adat kanun ngon reusam

Woe linto pajan, teungku peuteuntee

Seulangke Blah Dara Baro....

Boh minjee tatuka ngon breueh

Boh aneuh tuka ngon pade

Keu hai jeunamee neudeungoe beu dueh

Siploh manyam meuh beu ikhlah hate

Watee woe linto wakilah geubri

Meunurot dali “oh lheuh sikula

Uroe meunikah, malam khanduri

Meunurot janji bek roh meutuka

Seulangke Blah Linto....

Seureubarasa timoh di buleun

Patah saboh dheun leukang ngon tangke

Dek Nur Aini lon tamse bungong lam mideuen

Kamoe boh rangkheum bek gob tamong le

Hana peue meubri keu bungong jaroe

Seubab kamoe nyoe gasien lagoina

Ranup sigapu boh pineung teucang

Pulang keu cut bang keu tanda mata

2.INTAT LINTO (SEUMAPA)

Pihak Linto....

Assalamu’alaikum lon meubri saleum

Keu rakan bandum syedara lingka

Lon lakee meu”ah bak droeneuh bandum

Kadang leupah kheun hana seungaja

Di gampong Blang Oe kamoe beurangkat

Meunuju meuhat keunoe meuteuka

Lagee meukeusud yang ka ta hajat

Teumenjak sambat taloe syedara

Leubeh ngon kureueng bek neukheun sapeue

Cit ka neuteupeue uleh syedara

Seubab kamoe nyoe cit ureung duson

Tinggai lam gampong jeu oh ngon kuta

Ngon jalo puntong peungayoh patah

Lon ilah-ilah keunoe lon teuka

Peuturot hate sabe lam gundah

seubab that susah judo lon mita

Ka mate raja, mate ngon putroe

Tutong meuligoe nanggroe pih pahna

Hana soe gaseh hana soe sayang

Beuneutem pandang meusiblah mata

Pihak Dara Baro....

Alaikum salam jamee baro troh

Neudong neupiyoh siat dilua

Neupiyoh siat dang-dang tho reuoh

Di gampong jeu oh bantroh neuteuka

ranup kuneng on digampong Lamreh

Kareung meucngkeh pasi Krueng Raya

Padum treb lawet kamoe meupreh preh

Uroe nyoe jadeh syedara teuka

Labohan Haji pasi Lhok Paoh

Kuala Susoh raya that sawa

Haba ka kawi janji ka putoh

Uroe nyoe katroh linto ka neuba

Taek u gle u Padang kawat

Ranup meulipat lam ija bungkoh

Neudong dilua neupiyoh siat

Cit meunan adat ureung tuha boh

Pihak Linto....

Di Pantu Labon di Panton Labu

Sinyak jeb susu saboh glah dua

Lon balek langgam lon tuka buhu

Adak bak tinju ronde ke dua.

Ranup kuneng on di gampong Juli

Pineung keutanggi Geulumpang Dua

Meuah Desya lon tanglong kudangdi

Beu ek Tuhan bri tanyoe bahgia

Puncak Seulawah manyang  alon

Saboh seunuron tanoh cempaga

Sigo bak adek rindu ngon rihon

Siribee bak lon ateueh jeumala

Ie krueng Keureuntoe nanggroe Lhoksukon

Aneuk buya tron Kuala Jangka

Malam ngon uroe jaroe lon seu on

Rindu hate lon adek keu gata

Neu izn kamoe tamong lam keubon

Meujak duek ayon taman istana

Dilon hai adek apon han apon

Sang-sang ka meuthon tan lon eue gata

Ranup kuneng on di gampong Lamreh

Kareueng meucungkeh pasi Krueng Raya

Rombongan linto reu oh ka lileh

Bek le neupeupreh kamoe dilua

Pihak Dara Baro....

On tapak tapong

Lam jurong on tapak guda

Ronde peurtama kalheueh berlangsong

Deungoe lon sambong ronde keudua

Jaroe lon siploh diateuh ulee

Meuah lon lakee bak jamee teuka

Jaroe lon siploh lon bot sikureung

Geunantoe lon leueng tika mushalla

jaroe sikureung ulon bot lapan

Geunantoe talam cipe dalica

Jaroe ruti goh deungon halua

jaroe lon tujoh lon beu ot nam

Geunanto talam pirak suasa

Jaroe ulon nam lon beu ot limong

Geunanto bungong si meulu cina

Jaroe lon limong ulon beu ot peuet

Geunanto jeubeuet ngon minyeuk ata

Jaroe ulon peuet ulon beu ot lhee

Geunanto teubee lason u muda

Jaroe ulon dua ulon bot

Geunanto pulot kupi ngon bada

jaroe lon dua beu ot saboh

jeh pat dirumoh ka lon leueng tika

Ka jeuet neutamong wahe teungku jroh

Bek le diyub moh uroe ka jula

Neupeurab laju keudeh bak guci

Neujak rhah gaki jamee ube na

Neu ek bak reunyeuen beu ingat-ingat

beukong neumeumat reunyeuen leupah gla

ta peurab laju hai teungku linto

jeh dara baro jipreh preh gata

Duek di seuramoe diateuh kaso

Cit ka geu ato le ureueng tuha

Pihak Linto....

Tajak u pasi jak kawe eungkot

Taboh peurambot beuneung peunuta

Teungku jak dikeue kamoe dilikot

Cit meunan patot adat keureuja

Ureung Tuha Bak Reunyeuen....

Kru seumangat, beuseulamat beu mubahgia

Bek meu aneuek sithon-thon lhee

Bek meu meulintee sithon-thon dua

beu meu aneuek beu jareung-jareung

A mantong teulinteueng adoe bek kana

Beu meu aneuek beu meu cuco

Bek lagee rabo dalam paya

Beu meuaneuek beu meunceundieng

bek lagee bak trieng ngon bak meureuya

 Beu meu aneuek beu meu cuco

Bek lagee pade dalam blang raya

sabab jameuen nyoe hanjeut meunan le

Kana KB keluarga beureuncana

 Mempersilakan Khanduri....

Ulon tuan nyoe keunaleueng lidah

Haba amanh dari keuluarga

Nibak uroe ngon izin Allah

Peuget walimah peujamee syedara

Hidang bak kamoe hana meulapeh

Lam cipe puteh siseue bak tika

Bu kamoe boh lam pingan puteh

Meuah hai wareh keureukai hana

Gulee boh labu eungkot bak pisang

Keu manok panggang bek neumeuhawa

Neutunggeng geupet neurhah ngon jaroe

Neupa joh beutroe bu ngon sira

Eungkot di laot ta deungo gah

Teununyok patah bak culok sira

Nyan keuh nyang ek kamoe seleuah

Beuraya meuraya meuah hai jamee teuka

Kadang ka masam leupah boh maken

Kadang cit masen ka leupah sira

Beuraya meuah hai puteh licen

Adat meukawen dikamoe le that yang cupa

Aneuk leuek kutru dicong u manyang

Tulo jikuthang dicong sialet

Yang keubiet narit haba lon peutrang

Neubuka hidang neutunggeng geupet

Neutunggemg geupet neusrah ngon jaroe

Neupa joh beutroe bu ngon sira

Yang kreuh-kreuh tinggai keu ureueng po rumoh

Yang leumoh-leumoh keu jamee teuka

Bismillahir rahmanir rahim.....

3.PEUJOK LINTO

Pihak Linto....

Laen uteuen laen peulandok

Laen banda laen datok

Laen uteuen laen bak kayee

Laen gampong laen lagee

Adat  meukawen pih macam-macam

Kanun ngon reusam meusingklet-singklet

Ramee ureueng yue ramee ureueng tham

Meuhan jeut tapham jadeh meupalet

Sigitu hirang

Ube blang hirot

Sineuek patah aneuek jang

Ban saboh blang jiteubiet eungkot

Dua sijoli lon bri seuneu on

Bungong jaroe lon malam seumapa

Gata ban dua hai cahya ie mbon

Beusabe rukon siumu masa

beuteugoh-teugoh peulayeue jalo

Bek roh meutajo lam anoe pante

Beuteugoh-teugoh gata sijudo

Bek roh teulanjo bak buet teukeuse

peulara tuboh yoh goh teulanjo

Peulara tuto bek na yang singke

Teulanjo langkah bagah ta mundo

Teulanjo tuto meupaloe akhe

Teulanjo langkah mudah ta silat

Keubit bagah that keumah ta mundo

Teulanjo nariet keubit meugriet that

Peulom bak teupat tamita judo

rambot sikarang leukang bak tangke

Bungong sirungkhe hanco meuleuna

Asai phon luka bak mata kude

Asai phon pake bak leupah haba

Meutan hareuta cit punca pake

Beuna tapike hai kawom muda

Hanjeuet dikanto tajo dalam gle

Jak tarek awe jak mita rusa

Hanjeuet meupukat jak mat go kawe

Hanjeuet meupande jak seu on raga

Hanjeuet bak lada gisa bak pade

Taloe bineh gle tanaman muda

Yang jak meulampoh beuluwah ladang

Yang jak meugoe blang beule peunula

Yang jak u laot jak ikot pawang

Yang jak u ladang ikot peutua

Yang jak sikula sambong beu manyang

Yang jak meudagang beujeut fukaga

Yang duek bak keudee beule that barang

Yang jeuet keu tukang beule keureuja

Ho ka teungku dum ureung gampong

Nyoe pat aneuk lon neueue neujaga

Udep neubri bu nyoe neutem bantu neubri beulanja

Mate neubri kubu nyoe neutem bantu neubaca do’a

Lon tot naleung tutong rangkileh

Haba ka habeh malam ka jula

Ranub digapu boh pineueng teu cang

Pulang keu cut bang keun tanda mata

Labohan Haji pasi Peulumat

Ujong meusambat pasi Keumumu

Keu kamoe jak woe  do’a seulamat

Droeneuh yang tinggai beupanyang umu

 Pihak Dara Baro....

Ranub teungku bri kalheueh lon pajoh

Hana lon bri ro uluwa tika

Ranub lon pajoh bungkoh lon pulang

Bek jeut keu utang geutanyoe dua

4.PEUNULANG

Ayah Linto....

Assalamu’alaikum hai tuan bisan

Di gampong halaman keunoe neuteuka

Nibak  uroenyoe ngon izin Tuhan

Dum persoalan kalheueh seunia

Kadang pieh pajan tagisa tawoe

Keu bungong jaroe hana sapeu na

Nyoe pat na daruet na sineuk leumo

Tacok neuek jinoe jeut keu pusaka

Beuget tajaga malam ngon uroe

Tacok leumo nyoe meu’ue lam paya

Beuthat beu gasien bek roh tapubloe

Seubab leumo nyoe leumo pusaka

Nyoe pat na Ma bri cawan ngon pingan

Laen nibak nyan hana sapeue na

Lon lakee do’a keudeh bak Tuhan

Dua gata nyan beu ek sijahtra

Dara Baro....

Alaikumsalam po bungong nipah

Jaroe dua blah ateuh jeumala

Na saboh leumo neubri le Ayah

Jeut kamoe papah beungoh ngon sinja

Beuthat beu gasien beuthat beu sosah

Leumo bak ayah han lon peugala

meunyoe mate lon, lon boh keu kaphan

sabab leumo nyan leumo pusaka

‘Oh troh bak watee musem meugoe blang

lon cok leumo nyan meu’ue lam paya

‘Oh lheueh keumeukoh beu ek na pade

Kon han susah le kamoe nyoe dua

Talakee do’a dak jeut bek mate

Meu aneuek sabe sithon-thon dua

kamoe teurimong ngon ikhlah hate

Bedu ek meusampe peunulang Ayahanda

5. WASIET UREUENG CHIK

Aneuk meutuwah gata bandua

wasiet ayahanda keu gata intan

Tajak hai aneuek beu mubahgia

Raya that do’a bak ulon tuan

Ulon peuingat Nur Aini bak gata

Beuraya saba taikot cut bang

Bek sagai neuk e tuto yang gasa

Ngon lakoe gata meugaseh sayang

‘Oh si juek tatop hugop tabuka

Saket anggota taceupet badan

Tika eh lakoe hai cahya mata

Beuget ta jaga uroe ngon malam

Peue yang jipeugah bek roh tabantah

Bek mita ilah peulom meudakwa

Tapubuet suroh peujioh teugah

Yang larang Allah bek takeureuja

Meuna tajak-jak u nanggroe Haji

Bak kubu Nabi talingka-lingka

Utang tapeuglah seudeukah tabri

Cit na reuseuki laen digata

Bukon le sayang lon kalon panyot

Mate sigo phot ‘oh malam jula

Seumayang beuyakin ibadat beujeumot

Adat troh maot kana peue taba

Beutegoh-teugoh taek bak panjo

Teutop ngon duroe luka bak dada

Gata ka tajak taseutot lakoe

Beuna tawoe saweue-saweue ma

Ulon peuingat bak gata intan

Bacut lon peusan bandua gata

Kadang mate lon, lon woe bak Tuhan

Silapeh kaphan taboh bak gata

Bak uroe meugang hate lon bingong

Bek le tatanyong nyoe uroe raya

Keupeu dak na sie siploh beulangong

Nyoe aneuk inong hana sajan ma

Mudah raseuki Tuhan bri kaya

Gata bandua seulamat iman

‘Oh noe keu mantong lon peusan haba

Pateh wasiet ma seulamat jalan

Ya  Ilahi  waya  Rabbi

Awak nyoe neubri beu ek sijahtra

Beupanyang umu mudah reseuki

rakhmat beu neubri meuganda-ganda

Ya Tuhan neupeu ampon desya kamoe

Lom neupeu ampon desya ureung lam rumoh nyoe

Neupeu ampon desya ma ku guree lon sajan

Neuteurimong do’a kamoe, amin...amin...

Sumber  : - Ibu Royani  

                   - LAKA – Lembaga Adat dan Kebudayaan Aceh